A primeira edición do showcase de A Canteira Experience remata cun novo caso de éxito

A primeira edición do A Canteira Experience Showcase chegou ao seu fin despois de catro xornadas en Vigo nas que 28 novos futbolistas de 11 nacionalidades diferentes puideron coñecer de preto a metodoloxía de A Canteira e vivir unha experiencia de formación e competición xunto a técnicos do Celta. O programa incluíu seis sesións de adestramento, avaliacións, charlas formativas, partidos e diferentes actividades vinculadas ao club.

Entre todos os participantes, Ian, novo futbolista hondureño, converteuse no gran protagonista desta primeira edición. O seu rendemento durante o Showcase chamou a atención dos adestradores de A Canteira, que decidiron darlle a oportunidade de prolongar a súa estadía en Vigo durante varias semanas máis para continuar adestrándose co Cadete B dentro da estrutura de canteira do Celta.

Un novo caso de éxito

O caso de Ian súmase a outras historias que reflicten as oportunidades que pode xerar A Canteira Experience para novos talentos internacionais. Futbolistas como Yua, Joseph ou Rodrigo Gadea tamén atoparon no proxecto unha vía para achegarse ao fútbol de formación do Celta e continuar desenvolvendo o seu potencial en Vigo. Historias que reforzan a vocación de A Canteira Experience de conectar o talento internacional coa metodoloxía e a estrutura de A Canteira.

Unha primeira edición con balance positivo

O balance desta primeira edición, da man de Panda Events 4 Sports, foi moi positivo, tanto pola experiencia vivida polos 28 participantes como polas oportunidades que xerou. O caso de Ian supón un primeiro caso de éxito que reforza a vocación de continuidade do Showcase, unha iniciativa que nace co obxectivo de converterse nunha cita estable para formar e desenvolver talento internacional en Vigo.