De Uruguai a Vigo: A Canteira Experience segue achegando o Celta a mozos futbolistas internacionais

Fede, Salva, Basti e Fausti viaxaron desde Uruguai ata Vigo para gozar de todo o que ofrece o programa A Canteira Experience. Durante unha semana, os catro participantes integráronse na dinámica de traballo de A Canteira, adestrando nas instalacións do Celta e compartindo o terreo de xogo con mozos doutras nacionalidades. Unha oportunidade para mellorar as súas habilidades futbolísticas, coñecer novas formas de traballar e aprender nun contorno que fomenta tanto o desenvolvemento deportivo como o crecemento persoal.

Máis alá dos adestramentos, a experiencia tamén lles permitiu achegarse á historia e á identidade celeste. Os mozos e as súas familias percorreron o estadio ABANCA Balaídos, visitaron o museo do Celta e descubriron a cidade de Vigo, completando unha estadía na que o fútbol foi o fío condutor dunha experiencia compartida tamén cos seus seres queridos.

Unha experiencia que deixa pegada

O programa A Canteira Experience vai máis alá do traballo sobre o céspede. A convivencia con xogadores doutros países, o contacto cunha metodoloxía de formación diferente e a posibilidade de coñecer desde dentro o funcionamento dun club profesional converten cada estadía nunha oportunidade de aprendizaxe e enriquecemento persoal.

A visita de Fede, Salva, Basti e Fausti reforza, ademais, o vínculo entre o Celta e Uruguai a través da formación internacional. Desde 2022, da man de La Costa Fútbol, un total de 34 mozos futbolistas uruguaios viaxaron a Vigo para participar nalgunha das experiencias desenvolvidas no marco de A Canteira Experience.

Unha traxectoria que reflicte a continuidade dun proxecto orientado a abrir as portas de A Canteira ao talento internacional, compartir os valores do club e xerar experiencias que transcenden o ámbito deportivo.

De Uruguai a Vigo, cada estadía suma novas historias, aprendizaxes e recordos. Porque A Canteira Experience non consiste unicamente en adestrar nas instalacións do Celta, senón tamén en descubrir a súa identidade, compartir a paixón polo fútbol e levar consigo unha experiencia difícil de esquecer.