Celta, Universidade de Vigo e EUSES-Vigo reforzan a súa alianza para impulsar Celta360
18 Decembro 2025
O Celta e o Wakatake Group renovaron o seu convenio de colaboración, reforzando unha relación estratéxica que se foi consolidando ao longo dos últimos oito anos e que continúa medrando con novos obxectivos comúns. A sinatura tivo lugar esta mañá no Salón Rexio de A Sede, e contou coa presenza de Fernando Iturbe, manager de Desenvolvemento de Negocio de Celta360, en representación do club, e de Joel Santos Boedo, director xeral da entidade xaponesa.
A renovación do acordo contempla dúas liñas de traballo claramente diferenciadas. Por unha banda, o acordo marco entre o Celta e o Wakatake Group consolida unha relación de longo percorrido, reforzando e ampliando as liñas de colaboración nas que ambas as entidades xa viñan traballando. Este marco inclúe o desenvolvemento de experiencias de xogadores integrados no fútbol formativo do club, a acollida de estancias de grupos en Vigo e a realización de clinics oficiais do Celta en Xapón, sempre baixo a metodoloxía e os valores da entidade celeste.
Por outra banda, o acordo incorpora unha segunda liña orientada á expansión internacional do proxecto máis alá das fronteiras de Xapón, coa incorporación de TFL como novo partner estratéxico. Esta colaboración permitirá traballar de maneira conxunta no desenvolvemento de programas e experiencias en mercados como o estadounidense e o escandinavo, ampliando o alcance e a proxección global do proxecto.
Ademais da sinatura do acordo, os representantes de Wakatake Group e TFL aproveitaron a súa estancia en Vigo para coñecer de primeira man o día a día da canteira celeste e a aplicación práctica da metodoloxía do club, así como para asistir a un partido en A Madroa. Por parte de TFL acudiron Manuel Morcillo Martín, director de scouting e representación, e Víctor Muñoz Martiañez, director xeral. Así mesmo, a televisión xaponesa Dosanko TV estivo representada polo xornalista Seto Masato, que se desprazou ata Vigo para realizar unha reportaxe sobre a formación e a vida dos mozos futbolistas no contorno do club.
Con este tipo de acordos, visitas institucionais e colaboracións con medios estranxeiros, o Celta, a través de Celta360, continúa estreitando a súa relación con Wakatake Group, que apostou de maneira decidida polo club celeste e situou o seu proxecto en Vigo como a súa iniciativa máis relevante en España, consolidando así un camiño conxunto baseado na confianza, na formación e no desenvolvemento do fútbol base a nivel internacional.
Os tres protagonistas coincidiron en valorar moi positivamente o acordo. Desde o Celta, Fernando Iturbe destacou a satisfacción e o orgullo por consolidar unha relación de oito anos integrada agora no proxecto Celta360, que reforza as liñas de traballo xa existentes e abre novos mercados estratéxicos como o americano e o escandinavo coa incorporación de TFL. Pola súa parte, Joel Santos subliñou que o obxectivo é dar continuidade a case dúas décadas de colaboración, fortalecendo iniciativas formativas internacionais e avanzando cara a un ecosistema global interconectado. Finalmente, Manuel Morcillo sinalou que para TFL é unha honra sumarse á alianza, coa meta de unir forzas entre mercados e contribuír ao impulso internacional da marca e do club.
- Sobre Wakatake Group
Wakatake Group é unha empresa xaponesa coa misión de contribuír ao desenvolvemento de mozos xogadores de fútbol na súa transición de nenos a adultos. Wakatake Group leva case 20 anos desenvolvendo unha ampla variedade de programas deportivos, con presenza en Europa, África, Asia e América. Estas experiencias internacionais contribúen ao desenvolvemento do xogador e da persoa, tanto dentro como fóra do terreo de xogo. Wakatake Group traballa seguindo unha fórmula formativa contrastada: experiencias internacionais, educación holística e responsabilidade social. - Sobre TFL
TFL FC é un programa residencial internacional de alto rendemento para xogadores internacionais, orientado ao seu desenvolvemento deportivo, formativo e persoal dentro de contornos profesionais de fútbol, facilitando o seu crecemento e proxección dentro e fóra do terreo de xogo.
