O proxecto Celta360 chega ao Xapón con novos Clinics de A Canteira Experience

O Celta segue reforzando a proxección internacional da súa metodoloxía de formación cunha nova iniciativa no Xapón. Do 19 ao 30 de xullo, dous técnicos de Celta 360, Víctor González e Diego García Sarabia, estarán no país asiático para impartir unha serie de Clinics de A Canteira Experience en colaboración con Wakatake Group, achegando a identidade e o modelo de traballo do club vigués a mozos futbolistas xaponeses.

Durante a súa estancia, os adestradores desenvolverán tres xornadas formativas en diferentes cidades do territorio xaponés. A primeira terá lugar en Chiba, os días 21 e 22 de xullo, coa participación de 34 xogadores. Posteriormente, a actividade trasladarase a Aichi, entre o 23 e o 25 de xullo, onde adestrarán 19 participantes. O percorrido concluirá en Osaka, os días 26 e 27 de xullo, con 27 futbolistas inscritos.

En conxunto, preto de 80 mozos formarán parte destes Clinics, concibidos para ofrecer unha experiencia de adestramento baseada na metodoloxía da canteira do Celta. Ao longo das sesións, os técnicos compartirán os principios de traballo que caracterizan o club, poñendo o foco tanto no desenvolvemento técnico e táctico como na formación integral dos xogadores.

Esta iniciativa enmárcase dentro do compromiso de Celta 360 por levar o modelo formativo do club a novos mercados, establecendo alianzas con entidades internacionais e creando oportunidades para que futbolistas de diferentes países coñezan de primeira man a filosofía de traballo da canteira celeste.

Con accións como esta, o programa de A Canteira Experience continúa consolidando a súa presenza internacional e reafirma a súa aposta por compartir un modelo de formación que transcende o terreo de xogo e sitúa o desenvolvemento da persoa e do futbolista no centro do seu proxecto.