O Real Sporting escolle Celta360 para realizar un training camp de pretempada

Celta360 continúa consolidándose como un destino de referencia en Galicia e norte de Portugal para a preparación de equipos profesionais, algo que se reforza co feito de que o Real Sporting escolleu o ecosistema Celta360 para levar a cabo un training camp de pretempada co que preparar o inicio do curso 2026/2027.

O conxunto asturiano desenvolverá durante varios días unha parte da súa planificación estival en Vigo, onde se aloxará mentres completa as súas sesións de adestramento nun dos terreos de xogo da Cidade Deportiva Afouteza. Esta estancia coincidirá coa disputa de dous encontros amigables en terras galegas: o primeiro fronte ao Celta Fortuna, o 22 de xullo na Madroa, e o segundo ante o primeiro equipo celeste, o 25 de xullo en Vilagarcía de Arousa.

A elección do Sporting supón un novo respaldo ao proxecto Celta360, concibido para poñer á disposición dos clubs profesionais unhas instalacións do máis alto nivel nun contorno privilexiado. O complexo ofrece todas as condicións necesarias para o desenvolvemento de concentracións e training camps, combinando campos de adestramento de primeiro nivel, servizos especializados e un contorno idóneo para a preparación deportiva.

Esta nova estancia súmase ás que o club vigués xa organizou durante a pasada campaña aproveitando a súa presenza na UEFA Europa League, onde acolleu algúns dos clubs que visitaron Vigo para xogar contra o Celta na competición continental, como o OGC Nice, o PAOK ou o Olympique Lyonnais. Celta360 segue avanzando nun dos seus principais obxectivos estratéxicos: converterse nun referente na acollida de equipos nacionais e internacionais que buscan un espazo de excelencia para desenvolver as súas concentracións e xerar novas vías de ingresos a través da explotación das súas infraestruturas deportivas.