Joseph segue medrando: de A Canteira Experience á selección nacional sub-20 de Tanzania

O crecemento de Joseph segue dando novos pasos. O mozo futbolista tanzano, que chegou a Vigo a través do programa A Canteira Experience, foi convocado pola selección de Tanzania sub-20 para participar nos compromisos internacionais deste mes de novembro.

O combinado tanzano enfrontarase a Exipto en dous encontros amigables, programados para os días 12 e 16 de novembro, nunha nova oportunidade para que Joseph siga acumulando experiencia e desenvolvéndose no fútbol internacional.

A súa convocatoria supón un novo capítulo nunha historia que comezou coa súa chegada a Vigo a través de A Canteira Experience. Tras case tres anos de formación baixo a metodoloxía do Celta e a súa posterior experiencia co Xuvenil B, Joseph continúa avanzando na súa traxectoria deportiva, demostrando que o traballo, a constancia e as oportunidades poden abrir novas portas.

Para Celta360 e todo o equipo de A Canteira Experience, ver como un mozo que chegou desde Tanzania co soño de medrar como futbolista ten hoxe a oportunidade de representar o seu país é un enorme motivo de orgullo. A súa evolución representa o propósito do proxecto: acompañar o desenvolvemento de novos talentos de todo o mundo e axudarlles a achegarse aos seus obxectivos deportivos e persoais.